OPINION ni GERARD PAREJA SA MISS CEBU 2009

By Gerard Pareja
Cebu Daily News

Samtang gatan-aw kos presentation sa Miss Cebu 2009 candidates misulod sa akong huna-huna ang binuang nga sugilanon kabahin ning mga judges sa beauty contest. Sama ning mga jurado nadugay nausab akong gasunod ning Miss Cebu beauty pageant. Ug duna na akoy pipila ka butang nga namatikdan.

Mao kini akong napanid-an sa usa ka dekadang pagsunod ning maong bangga:
Una, wala pay Miss Cebu nga dili maayo moyawyaw. Bisag walay unod ang ilang ipanulti basta kay may ikayawyaw lang sila.

Ikaduha, wala pay Miss Cebu nga boobsy o dakug dughan. Usahay manglugwa na lang ang ilang mga padding kay ni-slide na ang ilang mga gown.

Ikatulo, wala pay Miss Cebu nga putot. Mga 5’4” ngadtos 5’8” ang height sa kasagarang ma rayna ning maong beauty contest.

Ikaupat, wala pay foreign og apelyido nga nakadaug.

Nabantayan ko usab nga pabor sa morena o tabunon ang makadaug. Kasagaran usab kanila may backer nga bayot. Kadaghanan nila sakop na og modeling agency.

Ang mga kandidata para sa Miss Cebu 2009 naglakip kanila ni Ana Coritha Desamparado, Sheda Lyn Dusaban, Christine Tan, Nadia Claire Urbino, Tara Frances Oliver, Ethel Bitoon, Phoebe Kay Fernandez, Kimberley Therese Burden, Michelle Isa Eguia, Angela Grace Alinabon, Rizzini Alexis Gomez, Kris Tiffany Janson.

Unsa may atong mga panagna? Posible nga puti ug dili tabunon ang molusot karon. Duna usay purohan nga dughanan ang molusot karon. So kinsa may mosul-ob sa korona karong Sinulog?

Naproblema kos akong manok nga si Isa Eguia. Kinahanglan siyang patumaron og valium kay paspas ra kayo siya mosulti. Mahimong sabton sa manan-aw kining iyang insisturyahan nga simtoma sa nerbyos. Mag-una-una usab siyag katawa sa iyang pasiaw bisag wala pa ka react ang audience. Simtoma gihapon kini sa nerbyos. Daghan usab siyag mga pakapain nga istorya nga way labot sa pangutana.

Nasubo ako niani kay physically ang hitsura ni Isa classic nga pang Miss Cebu. Taas, nipis ug tabunon. Nindut usab siyag baba ug liog. Maayo usab siya moyawit. Nasubraan lang tingali ang iyang kakursunada moyawyaw. Mura siyag si ex-U.S. President Bill Clinton nga giingong – the problem is not that he can’t talk but that he can’t stop.

Ug kon dili molusot akong manok kinsa, man diay modaug? Sa hitsuraay og barog, close fight silang Kris Janson ug si Rizzini Gomez. Ug sa inistoryahay, ang kalma modag hambog mao sila ni Tara Oliver ug Rizzini Gomez. Ang maayo modag lakaw og rampa mao si Kris Janson. Si Janson usab ang gihugon-hugon nga manok sa mga designer.

Panid-an ko usa si Isa kon mapugngan ba niya ang iyang mga excesses sa pagsulti. Kon makat-unan ba niya in time ang magic slogan nga “Less is more.” Kon di gyud niya makat-unan basig maglisud siya pa sulod sa top five. With Isa out of the picture, it will be a coin toss between Gomez and Janson. Veteran vs. neophyte ang show. Mo-side-bet usab ako ni Oliver isip wild card nga baraw sa duha.